20-nji fewralda Aşgabatda BOMKA-10 maksatnamasynyň sebitleýin ýolbaşçy taslama toparynyň dördünji mejlisi geçirildi. Duşuşyk “Arçabil” myhmanhanasynda bolup, oňa Türkmenistanyň ministrlikleriniň we edaralarynyň wekilleri, BOMKA-10-nyň ýolbaşçylary, diplomatlar we halkara bilermenleri gatnaşdy.
Mejlisde Türkmenistanyň Oba hojalyk ministrliginiň ýanyndaky Döwlet weterinariýa gullugynyň halkara bölüminiň başlygy Arslan Soltanmyradow çykyş edip, bilelikdäki çäreleriň ýerine ýetirilişi, olaryň netijeliligi we BOMKA-10 çäklerindäki geljekki hyzmatdaşlygyň ileri tutulýan ugurlary barada maglumat berdi.
BOMKA-10 toparynyň her ýyl geçirilýän mejlisleri taslamanyň netijeliligini ýokarlandyrmaga gönükdirilen bolup, gazanylan öňegidişlikleri seljermäge, gatnaşyjylaryň pikirlerini almaga we sebitleýin derejede strategiki çözgütleri işläp düzmäge mümkinçilik berýär.
Mejlisiň dowamynda 2025-nji ýyl üçin iş meýilnamasy, satyn alyş işleri we BOMKA maksatnamasynyň indiki – on birinji tapgyry bilen baglanyşykly meseleler ara alnyp maslahatlaşyldy.
