ABŞ-nyň Gar we buz boýunça milli maglumat merkeziniň (NSIDC) berýän maglumatlaryna görä, 2025-nji ýylyň 13-nji fewralyna çenli Arktikada we Antarktikada deňiz buzlarynyň umumy meýdany rekord derejä – 15,76 million inedördül kilometre çenli azaldy. Hünärmenleriň aýtmagyna görä, bu görkezijiler 2023-nji ýyldaky öňki iň pes derejeden hem 0,17 million inedördül kilometr azdyr. Bu barada «IFLScience» neşiri habar berýär.
2025-nji ýylyň fewral aýynyň ortalarynda Antarktikadaky buzlaryň meýdany 2,12 million inedördül kilometre, Arktikadaky buzlaryň meýdany bolsa 13,64 million inedördül kilometre çenli azaldy. Alymlar bu azalmalaryň esasy sebäpleri hökmünde adatdan daşary ýokary temperaturalary we Antarktikadaky deňiz buzlaryny weýran edýän şemallary görkezýärler.
Bu üýtgeşmeler ak aýylara, düwlenlere, moržlara we pingwinlere howp salýar, sebäbi olaryň ýaşaýyş gurşawy düýpli üýtgeşmelere sezewar bolýar.
Polýuslardaky buz gatlaklarynyň azalmagy global ýylylyk bilen baglanyşyklydyr. Bu üýtgeşmeler howanyň durnuksyzlygyna sebäp bolýar. Netijede, polýuslardaky tebigy ekoulgama we biologiki köpdürlülige uly zeper ýetýär.
