Astronomlar 2024 YR4 asteroidiniň Aý bilen çaknyşmak ähtimallygyny maslahatlaşýar. Bu hadysa Ýeriň hemrasynda asteroidi haýallatjak atmosferanyň ýoklugy sebäpli, 500 – 2000 metr diametrli krateriň döremegine getirip biler.
New Scientist žurnalynda öz çaklamalaryny neşir eden alymlar şeýle çaknyşmanyň Ýerden görünjekdigini belleýär. Ol kuwwaty Hirosima taşlanan atom bombasyndan 343 esse güýçli bolan partlama sebäp bolup biler.
Şol bir wagtyň özünde çaknyşma mümkinçiligi örän az – 0,3%.
Ýöne asteroidiň 2032-nji ýylyň dekabrynda Ýere düşmek ähtimallygy 3,1%-e barabar. Deslapky çaklamalar 25-nji dekabrdan 18-nji fewral aralygynda asteroidiň hereketini öwrenmek üçin alnyp barlan 370 gözegçiligiň maglumatlaryna esaslandy.
Gaýtadan baha bermegiň netijesinde çaknyşma töwekgelçiligi tas 1,5 esse, 2,2-den 3,1%-e çenli ýokarlandy. Hatda şeýle pes ähtimallyk hem 2024 YR4 asteroidini häzirkizaman gözegçilik ulgamlary tarapyndan hasaba alnan Ýer üçin iň howply kosmos obýektine öwürýär. Şol bir wagtyň özünde planetologlar çaknyşma mümkinçiliginiň ýokarlanmagynyň howsala üçin sebäp däldigini belleýär: geljekki gözegçiliklerde orbitanyň takyklaşdyrylmagy çaknyşma ähtimallygyny doly aýryp biler.
Soňky gezek diametri 30 metrden uly bolan asteroid üçin çaknyşma ähtimallygyna 2004-nji ýylda şeýle ýokary baha berildi. Şonda deslapky maglumatlaryň esasynda planetologlar Ýeriň 2029-njy ýylda Apofis bilen çaknyşmak howpuny 2,7% diýip hasaplady. Ondan soňky gözegçilikler bu töwekgelçiligi doly aradan aýyrdy.
Alymlar “Jeýms Uebb” kosmos teleskopynyň kömegi bilen 2024 YR4 asteroidiniň traýektoriýasyny ünsli yzarlamagy dowam etdirýär.
