“Euronews” habarlar teleýaýlymynyň wekiliýeti ýerli mediaplatformalar bilen hyzmatdaşlyk etmek we ýurduň medeni mirasy bilen tanyşmak maksady bilen, Türkmenistana iş sapary bilen gelmegi meýilleşdirýär. Bu barada Türkmenistanyň Belgiýadaky ilçisi Sapar Pälwanowyň “Euronews” habarlar teleýaýlymynyň direktorlar geňeşiniň başlygy Pedro Wargas Dawid bilen duşuşygynda bellenilip geçildi. Muny Biznes Türkmenistan elektron ýurdumyzyň Belgiýadaky ilçihanasyna salgylanyp habar berdi.
Taraplar hyzmatdaşlyk ugurlaryny, şol sanda syýahatçylygy ösdürmek, medeni alyşmak hem-de möhüm wakalary köpçülige ýetirmek meselelerini ara alyp maslahatlaşdylar. “Euronews” habarlar teleýaýlymy özüniň "Explore", "Cult" we "Meet the Locals" atly gepleşikleriniň maksatnamalaryna Türkmenistany goşmaga hem-de ýurduň beýan ediliş ugurlaryny giňeltmäge, täze media taslamalary ösdürmäge taýýardygyny mälim etdi.
Ýewropanyň “Euronews” habarlar teleýaýlymy 1993-nji ýylda döredilip, gije-gündiziň dowamynda ýaýlyma berilýär. Onuň 19 dilde ýaýlyma berilýän gepleşikleri 1,2 milliard adamy öz içine alýar. Aýda 29 million hemişelik gyzyklanýan tomaşaçysy bolan teleýaýlymyň baş edara binasy Fransiýanyň Lion şäherinde ýerleşýär.
