Beýik Britaniýanyň Sautgempton uniwersitetiniň alymlary könelen tormoz kolodkalaryndan çykýan tozanyň howany häzirki dizel hereketlendirijileriniň çykarýan tüssesinden has köp hapalaýandygyny anykladylar. Bu tozan saglyk üçin howply, dem alyş ýollarynyň keselleriniň döremegine sebäp bolýar.
Ozal kolodkalaryň düzümindäki asbesti öýken keselleri bilen baglanyşdyrýardylar. Şol sebäpli awtoulag öndürijileri ony mis bilen çalyşmaly boldular. Emma mis hem zyýansyz däl. Şeýle-de bolsa, bu gadagan edilenok we hemme ýerde tormoz ýasaýjy öndürijiler tarapyndan ulanylýar.
Bilermenler organiki tormoz kolodkalary diýilýänleri hem synagdan geçirdiler. Synaga dürli düzümli kolodkalaryň birnäçe toplumy gatnaşdy. Olaryň hiç biri hem kanagatlanarly netijeleri görkezmedi.
Tormoz we teker bilen baglanyşykly emele gelýän zyňyndylary düzgünleşdirýän düzgünleriň ýoklugy sebäpli bu meseläniň has hem ýitileşýändigi bellendi. Barlagçylar tekerleriň hem daşky gurşawa zyýan ýetirýändigini bellediler.
