Soňky ýyllarda Ýeriň aýlanyşynyň tizleşmegi sebäpli alymlar bütindünýä wagtyndan bir sekunt aýyrmaly bolarlar. Düzedişi öňümizdäki birnäçe ýylyň içinde girizilmeli bolar diýip, Bütinrussiýa Fiziko-tehniki we radiotehniki ölçegler ylmy-barlag institutynyň baş müdiri Sergeý Donçenkonyň sözlerine salgylanýan RIA Nowosti habar berýär.
Alymyň sözlerine görä, beýle üýtgeşmeler hiç hili kynçylyk döretmeýär.
Institutyň baş ylmy işgäri Witaliý Palçikow ozal Ýeriň aýlanyş tizliginiň adatdan daşary artýandygyny, şonuň üçin 2029-njy ýyla çenli bu täsiriň öwezini dolmak maksady bilen bir sekunt aýyrmagyň zerurdygyny aýdypdy.
“Ýer gyzýar we planetanyň jümmüşinde güýçli prosesler bolup geçýär. Galyberse-de, bu hadysanyň adam işjeňliginiň netijesi bilen asla baglanyşygy bolman hem biler. Şeýle hem ol çynlakaý tebigy hadysalaryň habarçysy bolman biler"- diýip, Donçenko belledi.
Ol Ýeriň aýlanyşynyň haýallap, tizlenip bilýändigini düşündirdi. Planeta häzirki wagtda tizlenme tapgyryny başdan geçirýär. Ylym henizem bu hadysanyň takyk sebäplerini kesgitläp bilmedi, ýöne bu prosese buzluklaryň eremegi we suwlaryň ýaýrawynyň üýtgemegi ýaly faktorlaryň täsir edýändigi çak edilýär.
