2025-nji ýylyň 18-nji sentýabrynda Ýeriň golaýyndan 2025 FA22 asteroidi uçup geçer. Ol Aý orbitasynyň diametrinden biraz uly aralykdan geçer diýip, RYA-nyň Kosmos gözlegleri institutynyň Gün astronomiýasy barlaghanasy habar berdi.
Şu ýyl 2025 FA22 planetamyzdan million kilometrden az aralykdan geçýän iň uly jisim bolar. Asteroidiň ululygy, takmynan, 166 x 290 metre barabar, agramy Çelýabinsk meteoritinden 1000 esse ýokary (takmynan, 11 müň tonna). Ol sagatda 38,8 müň kilometr tizlik bilen uçýar. Alymlaryň hasaplamalaryna görä, onuň Ýer bilen çaknyşmak ähtimallygy örän pes, nola deň diýen ýaly.
2025 FA22 2012-nji ýylda açyldy we Apollon asteroidler toparyna degişli. Ol 676 günde Günüň daşyndan aýlanýar we oňa 132 mln kilometr aralyga çenli golaýlaşyp, 319 mln kilometr daşlaşýar.
Hünärmenleriň bellemegine görä, bu asteroid Ýeriň golaýyndan wagtal-wagtal uçup geçýär. Onuň soňky şeýle ýakyn gelmesi 1940-njy ýylyň 17-nji sentýabrynda bolup geçdi. Indiki gezek ol 2173-nji ýylyň sentýabrynda golaýdan geçer.
Alymlar asteroidi ýörite enjamsyz görmegiň mümkin däldigini belleýär: obýektiwiň diametri azyndan 30 sm bolan teleskop gerek.
Asteroidiň planetamyza iň ýakyn gelýän wagty Aşgabat wagty bilen 12:00 töweregi bolup geçer.
