7-nji noýabrda Ýeri Gün plazmasynyň uly zyňyndysy gurşap alar. Ol 5-nji noýabrda Aşgabat wagty bilen 16:00 töweregi bolup geçen M7.4 derejeli alawlamadan soň ýüze çykdy. Bu barada Russiýanyň ylymlar akademiýasynyň Kosmos gözlegleri institutynyň Gün astronomiýasy barlaghanasy habar berdi.
Hünärmenleriň aýtmagyna görä, plazma akymy gönüden-göni Ýere tarap hereket edýär we anna güni günortana çenli magnitosfera ýeter.
Alymlar birinji alawlamadan tiz wagtdan soň Günde ikinji, has kuwwatly zyňyndynyň bolup geçendigini aýtdy. Oňa M8.65 baly berildi. Onuň iň ýokary derejesi gije sagat 03:07-de hasaba alyndy.
“Ikinji bulut öňküsinden has uly we tiz. Ol anna güni göni birinjiniň yzysüre Ýere zarba urar, şol bir wagtyň özünde-de ýolda onuň yzyndan ýetip, onuň bilen bölekleýin birleşer” – diýip, çeşme habar berýär.
Soňky günlerde astronomlar üç güýçli alawlamany hasaba aldy, olaryň ikisi X kategoriýaly bolup, bular 2025-nji ýylyň iýunyndan bäri iň güýçlüsidir. Işjeňligiň ýokarlanmagy Günüň görünýän tarapynda birnäçe uly tegmilleriň peýda bolmagy bilen baglanyşdyrylýar. Bu ýerler durnuksyz bolup, ýakyn günlerde täze zyňyndylara sebäp bolup biler.
Çaklamalara görä, plazma akymlarynyň Ýeriň magnit meýdany bilen çaknyşmagy G3-G4 derejeli geomagnit tupanlaryna getirer. Radio aragatnaşygynda, nawigasiýa ulgamlarynda we energetika ulgamlarynda bökdençlikler, şeýle-de polýar şöhlelenmeleri bolup biler.
