Hytaýda täzelenen Tesla Model Y-niň köpçülikleýin önümçiligine başlandy. Cybertruck-a meňzeş elektrikli krossoweriň önümçiligi Şanhaýdaky «Gigazawodda» ýola goýuldy. Bu barada Tesla China kompaniýasynyň Weibo sosial torunda neşir eden habaryna salgylanyp, «Car News China» ýazýar.
Ilkinji seriýa Model Y awtoulaglary «Launch Edition» diýlip atlandyrylan ýörite görnüşde çykaryldy. Olar gök «Glacier Blue» reňk bilen boýaldy. Şeýle hem bu ulag 450 at güýjüne deň bolan iki hereketlendirijili ulgam bilen üpjün edildi.
Şanhaýda öndürilen ilkinji partiýanyň Model Y ulaglary NMC (nikel-marganes-kobalt) akkumulýator bilen işleýär. Onuň kuwwaty 78,4 kilowatt-sagat bolup, bir gezeklik zarýad bilen 719 kilometre çenli ýol geçmäge mümkinçilik berýär. Bu ölçeg CLTC standartyna görä kesgitlenildi.
Bu elektrikli ulag 0-dan 100 km/sag tizlige 4,3 sekuntda ýetýär. «Launch Edition» görnüşindäki Model Y doly hereketlendiriji ulgam bilen enjamlaşdyrylan. Ulagyň bahasy 253500-den 303500 ýuan (34800-den 41700 dollar) aralygynda üýtgeýär.
Şeýle hem ulagyň bir hereketlendirijili has arzan görnüşi hem bolar. Bu model bolsa 299 at güýjüne eýe. Onuň hereketlendirijisi 62,5 kilowat-sagat kuwwatly litiý-demir-fosfat (LFP) akkumulýatory bilen işleýär. Bu akkumulýator bilen ulag bir gezeklik zarýad bilen 593 kilometre çenli ýol geçip bilýär. Bu hem şol bir hytaý ölçegine, ýagny CLTC standartyna görä kesgitlenildi.
