Hytaýyň WeRide kompaniýasy Robovan W5 atly robot-kurýeri işläp düzdi. Bu täze nesil awtonom (öz-özüni dolandyrýan) ulag ýük daşamak usulyny düýpgöter üýtgedip biler. Ol doly awtonom ýagdaýda hereket edýär. Üstesine-de, umumy ýollarda gatnaw üçin niýetlenip, günüň 24 sagady üznüksiz işläp bilýär. Bu barada «New Atlas» neşiri habar berýär.
Robovan W5-iň iň möhüm aýratynlygy – onuň 1000 kg-a çenli ýük göterip bilmek ukyby. Ulag datçikler bilen enjamlaşdyrylan. Bu datçikler robota daş-töweregini 360 gradus derejede görmäge mümkinçilik berýär. Şonuň netijesinde ol ýoldaky beýleki ulaglary, pyýadalary, yşyklandyryş çyralaryny we dürli päsgelçilikleri kesgitläp bilýär. Şeýle-de ol dolandyryş ulgamy bilen üpjün edilen. Ol manýowrlary özbaşdak edip, päsgelçiliklerden sowlup bilýär. Şeýle-de ýoluň eňňidini göz öňünde tutup, howpsuz ýagdaýda duralga ýerleşmegi başarýar.
Robovan W5-iň akylly dolandyryş ulgamy WeRide kompaniýasynyň robot-taksileri we beýleki awtonom ulaglary bilen geçilen 40 million kilometre golaý ýol tejribesiniň esasynda işlenip düzüldi. Robot marşruty häzirki wagt şertlerine görä sazlaýan ýörite optimizasiýa ulgamy bilen enjamlaşdyrylan. Bu ulgam ýoluň ýagdaýyny seljerip, ugruny üýtgedip bilýär. Netijede, heläkçilik howpy azalýar we eltip bermek işleri has netijeli ýerine ýetirilýär.
Robovan W5 bir gezeklik doly zarýady bilen 220 km aralygy geçip bilýär. Onuň ýük bölümi 5,5 kub metr göwrümli bolup, ony dürli maksatlar üçin uýgunlaşdyryp bolýar.
