Hytaýyň “Neçža aždarhalaryň şasyny ýeňýär” (Нэчжа побеждает царя драконов) animasion blokbasteri taryhda iň girdejili multfilm boldy. Ol Pixar-yň geçen ýylky “Tapmaça-2” multfilminden öňe geçdi diýip, Maoyan petek platformasynyň maglumatlaryna salgylanyp, Reuters habar berýär.
Hytaýyň animasion filmi prokatda 12,3 mlrd ýuan (1,69 mlrd dollar) gazandy – bu mukdar Hytaýdan daşary deslapky satuwy we prokaty hem öz içine alýar. Dünýäde iň girdejili filmleriň sanawynda bu animasion film sekizinji orny eýeledi.
Şol bir wagtyň özünde bellesek, “Neçža-2” multfilminiň kassa ýygymynyň 99%-den gowragyny Hytaýyň materik bölegi üpjün etdi we bu, adatça, dünýä prokatynda girdejileriniň ýarysyny gazanýan golliwud taslamalaryndan düýpgöter tapawutlydyr.
HHR-iň kinoteatrlarynda multfilm 29-njy ýanwarda, ABŞ-da 15-nji fewralda çykdy. Mundan öň KHBS rekorda ýetmek üçin bu taslamanyň beýleki ýurtlarda çykmagynyň hökman däldigini belläpdi.
“Neçža aždarhalaryň şasyny ýeňýär” 2019-njy ýyldaky asyl multfilmiň dowamydyr. Ol XVI asyryň “Hudaýlaryň inwestiturasy” hytaý romanyna esaslanyp, Çentanguan şäherini goramaga çalyşýan jadyly güýji bolan oglan barada gürrüň berýär.
Hytaý bilermenleri HHR-de “Neçža-2-niň” gutarnykly girdeji ýygymynyň 16 mlrd ýuan (2,19 mlrd dollar) bolmagyny çaklaýar. Şeýle mukdar ony dünýäde iň girdejili bäşinji filme öwrer. Ondan köp diňe “Awatar”, “Ar alyjylar: Final”, “Awatar: Suw ýoly” we “Titanik” gazandy.
