Ýer ýüzünde iň uly aýsberg bolan A23a-nyň şu ýylyň ýanwar aýynda bölünip aýrylan uly bölegine ABŞ-nyň Milli buz merkezi tarapyndan resmi at berildi. Indi meýdany, takmynan, 80 inedördül kilometr bolan buz bölegi A23b diýlip atlandyrylýar. Bu barada Arktika we Antarktika ylmy-gözleg institutynyň metbugat gullugy habar berdi.
Häzirki wagtda A23a Günorta Georgiýa adasyndan 300 km uzaklykda demirgazyk-günbatara tarap hereket edýär. Iki hepdäniň içinde dünýäde iň uly aýsberg 70 km süýşdi. Mundan öň bu aýsbergiň Günorta Georgiýa adasy bilen çaknyşmak ähtimallygy ýokary hasaplanypdy. Ýöne aýsbergiň ýoluny üýtgetmegi netijesinde çaknyşma bolmady.
Ýatlap geçsek, A23a aýsbergi 1986-njy ýylyň sentýabrynda Filhner buzlugyndan bölünip aýryldy we uzak wagtlap Ueddell deňzinde hereketsiz durdy. 2023-nji ýylyň noýabrynda Antarktika kenarynyň ugry bilen hereket edip başlady. Geçen ýyl aýsberg 1,4 müň km töweregi ýol geçdi. A23b-niň nähili ýol bilen hereket etjekdigini wagt görkezer.
