2025-nji ýylyň ýanwarynda Boeing müşderilerine 45 sany, Airbus bolsa 25 sany uçar gowşurdy. Bu görkeziji 2023-nji ýylyň dekabryndan bäri Boeing kompaniýasy üçin iň gowy netije boldy. Önümçilik boýunça Boeing 2023-nji ýylyň mart aýyndan bäri ilkinji gezek Airbus-dan öňe geçdi diýip, «Reuters» neşiri habar berýär.
Boeing tarapyndan gowşurylan uçarlaryň esasy bölegini «737 MAX» modeli düzdi – jemi 40 uçar. Mundan başga-da kompaniýa dört sany «787 Dreamliner» we bir sany «777 Freighter» uçaryny gowşurdy.
Şeýle-de bolsa, täze sargytlar boýunça Airbus bäsdeşinden öňe geçdi: Airbus 51 sany, Boeing bolsa 36 sany täze sargyt aldy. Aýratynam giň göwreli «Airbus A350» uçary uly islege eýe bolup, 19 sany täze sargyt aldy.
Boeing indi «737 MAX» modeliniň önümçiligini aýda 38 uçara çenli artdyrmagy meýilleşdirýär, bu bolsa FAA tarapyndan tassyklanan iň ýokary derejedir. Ýanwar aýy üstünlikli geçse-de, kompaniýa önümçiligini doly dikeltmek we bazardaky ornuny pugtalandyrmak üçin entek köp iş alyp barmaly. Şeýle-de bolsa kompaniýa abraýyna ýeten zyýandan kem-kemden saplanyp başlady.
