Boeing Indoneziýada we Efiopiýada iki sany 737 MAX uçarlarynyň heläkçiligi bilen baglanyşykly kezzaplykda günäsini boýun aldy. Kompaniýa ABŞ-nyň Adalat ministrligi bilen geleşik baglanyşmaga ylalaşdy diýip, Reuters ministrligiň bildirişine salgylanyp habar berýär.
Geleşige laýyklykda, Boeing 243,6 million dollar jerime tölär we üç ýylyň dowamynda uçuşlaryň howpsuzlygyny ýokarlandyrmak üçin azyndan 455 million dollar sarp eder. Şeýle hem, korporasiýa tarapyndan ýerine ýetirilen işler barada ýyllyk hasabatlary çap etjek garaşsyz gözegçiniň bellenilmegi göz öňünde tutulýar.
Mundan başga-da, Boeing-iň direktorlar geňeşi iki uçar heläkçiliginde pida bolanlaryň garyndaşlary bilen duşuşmalydyr.
Indi bu şertnama kazyýet tarapyndan tassyklanmaly.
Reuters habar gullugynyň belleýşi ýaly, bu şertnama Boeing-e, "heläkçiligiň öňüsyrasynda kompaniýanyň kabul eden kararlaryna jemgyýetiň ünsüni çekip biljek" kazyýet işinden gaça durmaga mümkinçilik berer.
2018-nji ýylyň 29-njy oktýabrynda Indoneziýada Lion Air awiakompaniýasynyň Boeing 737 MAX uçary heläkçilige uçrady we 189 adamyň ölümine sebäp boldy. 2019-njy ýylyň 10-njy martynda bolsa, Efiopiýada şol bir kysymly uçar bolan Ethiopian Airlines hem heläkçilige uçrady we 157 adamyň ölümine sebäp boldy.
ABŞ-nyň prokuraturasynyň habaryna görä, korporasiýa Federal awiasiýa administrasiýasyny uçaryň programma üpjünçiligi babatynda ýalňyşdyrydy. 2021-nji ýylda Boeing Adalat ministrligi bilen şertnama baglaşdy, bu şertnama laýyklykda üç ýylyň dowamynda kompaniýa işlenip düzülen programma görä hereket etmelidi. Ýöne 2024-nji ýylyň maý aýynda prokuratura Boeing kompaniýasynyň bu şertleri bozandygyny aýtdy.
Uçar heläkçiliginiň pidalarynyň maşgalalary bu geleşigi tankytladylar. Käbirleriniň aklawçylary kazyýetiň bu karary ret etmegini sorajakdyklaryny aýtdylar.
