Russiýa 2027-nji ýyla çenli öz hemralaýyn internet ulgamyny işe girizmegi meýilleşdirýär. Bu barada žurnalistlere wise-premýer – RF-iň hökümet diwanynyň ýolbaşçysy Dmitriý Grigorenko habar berdi diýip, TASS belleýär.
“Häzirki günde şeýle tehnologiýalar bilen meşgullanýan birnäçe ýurt bar. Taslama durmuşa geçirmek tapgyrynda, 2030-njy ýyla çenli wagt bar. Biz 2026-njy ýylyň ahyrynda – 2027-nji ýylyň başynda olary synag-senagat ulanylyşyna goýbereris we internetden peýdalanmak üçin pes orbitadaky hemralar toparyny ulanarys diýip pikir edýäris” – diýip, Grigorenko belledi.
Hemralar toparynyň uçurylmagynyň esasy maksady çalt we arzan interneti üpjün etmekden ybarat. Grigorenko hemralar toparynyň çylşyrymly infrastruktura bolmazdan ýurduň islendik ýerinde we Ýeriň islendik nokadynda internete elýeterli bolmaga mümkinçilik berýändigini we onuň bahasyny peseldýändigini belleýär.
“Býuro 1440-yň” baş müdiri Alekseý Şelobkowyň belleýşi ýaly, 2027-nji ýyla çenli içerki önümçilige degişli bolan 250-den gowrak pes orbita hemrasyny uçurmak meýilleşdirilýär. Hemralaýyn internetden orta we iri kärhanalar, döwlet edaralary, uly we ýerli aragatnaşyk operatorlary, şeýle-de oba hojalygy, aragatnaşyk, ulag, syýahatçylyk ýaly ugurlarda hususy müşderiler peýdalanyp biler.
