Audi kompaniýasy üçin 2024-nji ýyl örän şowsuz boldy. Onuň satuwy 11,8% azaldy. Şol sebäpden nemes awtoulag öndürijisi strategiýasyny düýpgöter üýtgetmek kararyna geldi. Indi Audi has gymmat ulaglary öndürip, premium synpy we ýokary hili esasy ugur edinmekçi bolýar diýip, «Motor1.com» neşiri habar berýär.
Satuwlaryň peselmegi, şeýle hem Tesla, BMW we Mercedes bilen bäsdeşligiň güýçlenýändigi sebäpli, kompaniýa ulaglaryň bahasyny galdyrmaga taýyn. Hatda bu strategiýa satylan ulaglaryň sanynyň azalmagyna getirse-de, Audi gymmat ulag pudagynda öz ornuny berkitmek isleýär.
Audi geljek ýyllarda iň arzan modelleri bolan «A1 Sportback» we «Q2» ýaly ulaglaryň önümçiligini bes etmegi meýilleşdirýär. Olaryň ýerine has gymmat we ýokary derejeli modeller öndüriler. «A3» indi Audi üçin başlangyç model bolar.
Bular üýtgeşmeleriň diňe bir bölegi. Täze meýilnamalara görä, geljekde flagman «A8» modeliniň täzelenen görnüşleri peýda bolup biler. Mundan başga-da «Grandsphere» we «Urbansphere» ýaly täze konsept modelleriň hem çykarylmagyna garaşylýar.
Täze strategiýa Audi-niň bazardaky abraýyny has-da ýokarlandyrar, şeýle-de ony lýuks bazaryndaky brendlere has ýakynlaşdyrar. Şol sebäpden Audi ulaglarynyň bahalarynyň ýakyn wagtda ep-esli ýokarlanmagyna garaşylýar. Bu ýagdaý bolsa premium synp ulaglary halaýan müşderiler üçin brendiň has-da islegli bolmagyna itergi berer.
