Google öz Gemini emeli aň (EA) kömekçisine täze funksiýa goşdy. Bu funksiýa EA kömekçisine öňki söhbetdeşlikleri ýatda saklamaga we şol maglumatlary soňky jogaplarynda ulanmaga mümkinçilik berýär. Häzirki wagtda bu täzelik Gemini-niň iňlis dilindäki web wersiýasynda we mobil goşundysynda elýeterlidir diýip, Google-yň resmi blogynda mälim edilýär.
Täzelenme diňe «Google One AI Premium» abunalaryna hödürlenýär. Olar indi EA bilen söhbetdeş bolanlarynda, öň aýdylan zatlary ýene gaýtadan düşündirmezden, söhbetdeşliklerini dowam etdirip bilerler. Şunuň ýaly tehnologiýalar beýleki EA çat-botlarda eýýämden ulanylýar. Mysal üçin, ChatGPT hem öňki söhbetdeşliklerdäki jikme-jikleri ýatda saklap, ulanyjylaryň isleglerine görä jogap berip bilýär.
Täze funksiýa diňe konteksti ýatda saklamak bilen çäklenmän, ulanyjylara geçen söhbetdeşlikleriň gysgaça jemini soramaga hem mümkinçilik berýär. Bu aýratynlyklar maglumatlar bilen işleşmegi aňsatlaşdyryp, Gemini-ni uzak möhletleýin meseleler üçin has amatly gurala öwürýär. Meselem, ulanyjy öz soraglaryndaky üýtgeşmeleri yzarladyp ýa-da öň maslahatlaşylan pikirleri çalt ýatladyp bilýär.
Google öňümizdäki hepdelerde bu funksiýanyň dil goldawyny giňeltmegi we ony «Google Workspace Business» hem-de «Enterprise» ýaly korporatiw (edara görnüşli taraplar üçin niýetlenen) nyrhnamalara goşmagy meýilleşdirýär.
