Hytaýyň Chery konserniniň robototehnika ýöriteleşýän Chery Aimoga bölümçesi gysga wagtyň içinde özüni görkezen DeepSeek neýroulgamynyň işläp düzüjisi bilen hyzmatdaşlyk edip başlady.
Hyzmatdaşlygyň çäklerinde Aimoga robotlaryny ses arkaly dolandyrmagy kämilleşdirmek üçin DeepSeek platformasynyň ösen EA modelleri ulanylar. Eýýäm häzir kompaniýanyň bulut platformasynda Chery 4S robotlarynyň interfeýsiniň işini üpjün edýän DeepSeek V2, V3 we R1 modelleri ulanylýar. Eýýäm indiki hepdede bu robotlaryň hakyky şertlerde synaglary başlanar.
Chery Aimoga 2025-nji ýylyň birinji ýarymynda adampisint robotlary halkara bazaryna çykarmagy meýilleşdirýär. Ilkibaşda olary awtomobil saýlananda müşderilere kömekçi hökmünde awtosalonlarda ulanmak göz öňünde tutulýar.
Geljekde kompaniýa adamlary, robotlary we ulag serişdelerini birleşdirýän bitewi intellektual ekoulgamy döretmek isleýär.
Belläp geçsek, Chery EA pudagynda 2010-njy ýylda işläp başlady. Şondan bäri kompaniýa Baidu we iFlytek ýaly pudak ägirtleri bilen hyzmatdaşlykda öz “akylly” tehnologiýalar bazasyny yzygiderli ösdürýär. 2018-nji ýylda Chery EA pudagynda CHERYLION platformasyny işe girizdi. 2020-nji ýylda bolsa gumanoid robotlary işläp taýýarlamagyň aýratyn programmasyny döretdi.
Netijede, Aimoga brendi – gumanoid we it şekilli robotlaryň brendi hödürlendi we soňky 15 ýyl bäri kompaniýa işläp taýýarlamadan başlap, köpçülikleýin önümçilige çenli robototehnika ugruny yzygiderli ösdürip gelýär.
