12-nji fewralda Türkmenistanyň Jemgyýetçilik guramalarynyň merkeziniň edara binasynda ýurdumyzyň edara-kärhanalarynda zähmet çekýän çeper elli tikinçi zenanlaryň arasynda «Hünärim bar – hormatym bar» atly bäsleşigiň jemleýji tapgyry geçirildi. Bu barada "Türkmenistan: Altyn asyr" elektron neşiri habar berdi.
Bäsleşik Türkmenistanyň Zenanlar birleşiginiň Merkezi Geňeşi we Kärdeşler arkalaşyklarynyň Milli merkezi tarapyndan guraldy. Onuň maksady zenanlarymyzyň pederlerimizden galan nusgalyk däplerine, waspy dünýä ýaň salan gadymy milli nagyşlarymyzyň inçe syrlaryny nesilden-nesle geçirip, şu günlere ýetiren ene-mamalarymyzyň tikinçilik sungatyna bolan belent söýgüsini halkyň arasynda ýaýbaňlandyrmak, olaryň gymmatly baý iş tejribelerini açyp görkezmek, päk ýürekden zähmet çekýän zenanlaryň hünär ussatlygyny kämilleşdirmek bolup durýar.
«Hünärim bar – hormatym bar» atly bäsleşigiň jemleýji tapgyryna gatnaşýan gelin-gyzlar öz aralarynda bäsleşdiler. Birnäçe tapgyrdan ybarat bolan bäsleşikde emin agzalarynyň ses bermegi esasynda ýeňijiler yglan edildi.
Bäsleşigiň dowamynda aýdym-sazlar belentden ýaňlandy. Ýeňiji bolanlara Hormat hatlary we ýadygärlik sowgatlary gowşuryldy.
