Adamlar indi YouTube-a smartfonlarda däl-de, telewizorlarda has köp tomaşa edýärler. Platformanyň ulanyjylary her gün umumy dowamlylygy bir milliard sagatdan köp bolan mazmunlary görýärler diýip, platformanyň baş müdiri Nil Mohan habar berýär.
YouTube soňky iki ýyl bäri ABŞ-da iň köp görülýän wideo akym hyzmaty bolup gelýär we munuň esasly sebäpleri bar. Platformanyň administrasiýasynyň telewizor üçin niýetlenen goşundyny ep-esli üýtgedip, ony doly akym hyzmatyna öwürmek baradaky syýasatlary oňyn netijeler berdi.
«Telewizor görmek diýmek, indi barha köp adam üçin YouTube görmek diýen ýaly. Emma “täze” telewizor “köne” telewizor ýaly däl. Ol Shorts (hawa, adamlar olaram telewizorda görýärler), podkastlar, göni ýaýlymlar, şeýle-de sport, sitkomlar we tok-şoular ýaly adamlaryň eýýämden söýýän zatlaryny öz içine alýan interaktiw platforma» diýip, Nil Mohan aýtdy.
YouTube TV bölümi eýýämden 8 milliondan köp abuna ýetdi. YouTube Premium we Music bolsa, ilkinji aýdaky mugt abunalary hem hasaba almak bilen 100 million ulanyja ýetdi. Platforma geçen ýyl hem şu görkezijileri mälim edipdi.
YouTube-yň ýolbaşçysy hyzmatlaryň mundan beýläk-de kämilleşdiriljekdigini we YouTube Premium abunalarynyň täze aýratynlyklardan peýdalanjakdygyny wada berdi.
