Ermenistanyň Parlamenti "Ermenistan Respublikasynyň Ýewropa Bileleşigine goşulmak prosesiniň başlanandygy hakyndaky" kanunyň taslamasyny birinji garamakda tassyklady. Armenpress-iň habar bermegine görä, kanunyň taslamasyny 63 deputat goldady, ýedisi garşy çykdy.
Hökümetiň başyndaky “Raýat şertnamasy” fraksiýasynyň wekilleri resminamany goldap ses berdiler. “Ermenistan alýansy” oppozisiýa fraksiýasy ses berişlige gatnaşmady, beýleki bir “Hormatym bar” oppozisiýa fraksiýasy garşy ses berdi. Ermeni parlamentinde jemi 107 deputat bar.
Bu kanunyň taslamasy “Demokratik güýçleriň platformasy” raýat başlangyjy topary tarapyndan gurnaldy we başlangyjy parlamente hödürlemek üçin zerur bolan 50 müň gola derek 60 müň gol ýygnamagy başardy. Ermenistanyň hökümeti kanunyň taslamasyny 9-njy ýanwarda makullady.
Ermenistanyň premýer-ministri Nikol Paşinýan bu kanun taslamasynyň "Ermenistanyň Ýewropa Bileleşigine sözüň göni manysynda agza boljakdygyny aňlatmaýandygyny" we bu mesele boýunça kararyň "diňe referendum arkaly kabul edilip bilinjekdigini" aýtdy.
Paşinýan: "Kanun kabul edilenden soň, ÝB bilen olaryň göz öňüne getirýän we öz göz öňümize getirýän ýol kartalaryzy ara alyp maslahatlaşmaly" -diýdi.
