Tesla we SpaceX kompaniýalarynyň ýolbaşçysy Ilon Mask maýadarlar toparynyň üsti bilen OpenAI kompaniýasyny satyn almak başlangyjyny öňe sürdi. Ol ChatGPT döredijisini dolandyrýan täjirçilik däl guramany satyn almak üçin 97,4 mlrd dollar teklip edýär diýip, Wall Street Journal habar berýär.
Häzirki wagtda OpenAI öz gurluşyny üýtgedip, jemgyýetçilik bähbitli korporasiýa (PBC) modeline geçýär. Bu onuň täjirçilik ugurlaryny dolandyryşyň aýratyn bölümçä geçýändigini, täjirçilik däl böleginiň bolsa guramada diňe paýyny saklap galjakdygyny aňladýar.
Maskyň teklibi onuň OpenAI we baş müdiri Sem Altman bilen gapma-garşylygynda nobatdaky waka boldy. 2024-nji ýylyň ahyrynda Tesla-nyň ýolbaşçysy kompaniýa garşy şikaýat arzasyny berip, onuň PBC-e geçmeginiň öňüni almaga çalyşdy. Ol dekabrda hem bu üýtgetmeleri gadagan etmek talaby bilen kazyýete ýüz tutup, onuň OpenAI-iň esasy ýörelgelerine ters gelýändigini aýtdy.
Sem Altman jogap hökmünde Masky “dawa etmegi gowy görýän dawaçyl” diýip atlandyrdy. 2024-nji ýylyň 13-nji dekabryndaky açyk hatda OpenAI Maskyň täjirçilik däl guramasyny esaslandyryjylaryň biri hökmünde özüniň heniz 2017-nji ýylda täjirçilik modelini hödürländigini aýtdy.
Maskyň OpenAI-i satyn almak baradaky täze teklibini-de Sem Altman jogapsyz goýmady.
“Ýok, sagbol, ýöne isleseň, biz Twitteri 9,74 mlrd dollara satyn alyp bileris” – diýip, ol sosial ulgamda ýazdy.
Belläp geçsek, 2022-nji ýylyň oktýabr aýynda Mask Twitter-i 44 mlrd dollara satyn alypdy.
