Russiýaly syýahatçy Fýodor Konýuhow taryhy üstünlik gazanmagy başardy. Ol “Akros” kürekli gaýygynda Günorta Atlantikadan ýüzüp geçen ilkinji adam boldy.
Bu waka 2025-nji ýylyň 11-nji fewralynda bolup geçdi diýlip, syýahatçynyň Telegram kanalynda habar berilýär. Munuň üçin 73 ýaşly Konýuhow 68 gün sarp etdi. Ol Dreýk yklymara bogazyndan Günorta Afrika Respublikasyndaky Hoş Umyt burnuna çenli ýol geçdi. Maksadyna ýetmek üçin syýahatçy günde 15 sagat küreklemeli boldy.
Bu tapgyr üstünlikli tamamlanandan soň, Konýuhow öz syýahatyny dowam etdirip, Hindi ummanyny kesip geçmegi we Awstraliýanyň günorta-günbataryndaky Luin burnuna ýetmegi meýilleşdirýär. Onuň öňünde 4200 mil (6700 km-den gowrak) ýol bar.
Uzynlygy dokuz metr bolan “Akros” gämisi azyk önümlerini we enjamlary saklamak üçin suw geçirmeýän otag, şeýle-de syýahatçy üçin dynç alyş ýeri bilen üpjün edildi. Syýahatyň başynda bortda 100 kg sublimirlenen önüm hem-de suwy süýjediji gurluş, hemra aragatnaşygy we Gün batareýasy bardy.
Ýatlap geçsek, Konýuhow 2002-nji ýylda Kanar adalaryndan Barbadosa çenli Atlantik ummanyndan eýýäm geçipdi. 2014-nji ýylda Çiliden Awstraliýa çenli Ýuwaş ummanyny ýüzüp geçdi, 2019-njy ýylda bolsa Täze Zelandiýadan Gorn burnuna ýüzdi. Syýahatçy kürekli gaýyklarda jemi 428 gün geçirdi.
