Microsoft geçen ýyl Windows 10 operasion ulgamy üçin resmi goldawyň 2024-nji ýylyň oktýabrynda bes ediljekdigini habar beripdi. Şol bir wagtyň özünde kompaniýa ulanyjylaryň şol döwürden soň howpsuzlyk täzelenmelerini tölegli esasda alyp biljekdigini mälim edipdi. Indi bolsa Microsoft korporasiýasy ESU (Extended Security Updates – Giňeldilen howpsuzlyk täzelenmeleri) programmasyny, onuň jikme-jikliklerini we bahasyny köpçülige ýetirdi. Bu barada TechSpot neşiri habar berýär.
ESU programmasy Windows 11-e geçmäge taýyn bolmadyk ulanyjylar üçin niýetlenendir. Ol ulanyjylary howpsuzlyk täzelenmeleri bilen üpjün eder.
Häzirki maglumatlara görä, ESU programmasyna Windows 10 22H2 wersiýasy bolan kompýuterler goşulyp bilerler. Onuň birinji ýylynyň tölegi bolsa 61 dollardan başlar.
Mundan başga-da, Microsoft bu programmadaky ýyllyk tölegleriň her ýyl iki esse artjakdygyny we ESU hyzmatynyň üç ýyl dowam etjekdigini mälim etdi. Bu strategiýa ulanyjylaryň Windows 11-e çalt geçmekleri üçin alnyp barylýar.
StatCounter-iň statistikalaryna görä, häzirki wagtda Windows 11 bazaryň 36,7%-ini eýeleýär. Şeýle-de bolsa, meşhurlyk boýunça birinjiligi henizem bazardaky 60,33%-lik paýy bilen Windows 10 saklaýar.
