Windows 11 platformasyna geçiş durnukly depginlerde dowam edýär. Häzirki wagtda bu operasion ulgamy bazaryň 36,7%-ini eýeleýär. Şeýle-de bolsa, meşhurlyk boýunça birinjiligi henizem bazardaky 60,33%-lik paýy bilen Windows 10 saklaýar. Bu barada StatCounter-iň statistikalaryna salgylanyp, Windows Central habar berýär.
Şu ýylyň iýul aýynda Windows 10 operasion ulgamyna 10 ýyl dolýar. Oktýabr aýynda bolsa Microsoft ony hyzmat möhletiniň soňky tapgyryna geçirer. Bu ýagdaý mugt tehniki goldawyň we täzelenmeleriň bes ediljekdigini aňladýar. Edara görnüşli müşderiler Windows 10 bilen işlemegi dowam etdirmek isleýän bolsalar, möhüm täzelenmeler üçin töleg tölemeli bolarlar. Şol sebäpden, belli bir wagtdan soň, olara Windows 11-e geçmek has amatly bolar.
Mälim bolşy ýaly, Windows 11-iň işlemegi üçin esasy plata TPM 2.0 moduly bilen enjamlaşdyrylmaly, emma bu çäklendirmäni aňsatlyk bilen geçip bolýar. Şeýle-de bolsa, Windows 11-e geçiş täze kompýuterleriň satuw möçberiniň köpelmegine itergi berer diýlip garaşylýar. Öndürijiler geçen ýyl şu ýagdaýyň amala aşmagyna garaşýardylar, ýöne olaryň meýilleri hakykata öwrülmän galypdy. Bu ýyl bolsa Windows 10 üçin goldawyň bes ediljek senesiniň ýakynlaşýandygy sebäpli, Windows 11-e geçiş has-da ýygjamlaşar.
Ýene bir zada ünsüňizi çeksek, Windows 7 henizem bazaryň 2,4%-ini eýeleýär. Onuň goldawy mundan birnäçe ýyl öň bes edilipdi. Käbir ulanyjylar öňden ulanýan operasion ulgamlarynda galmak isleýärler, sebäbi täze operasion ulgamyna geçmek olar üçin tehniki we guramaçylyk taýdan çylşyrymly bolup biler. Mysal üçin, Beýik Britaniýanyň saglygy goraýyş ulgamynda 2018-nji ýyla çenli Windows XP ulanylypdy, olar diňe şol ýyldan soň Windows 10-a geçipdiler.
