Beýik Britaniýada laboratoriýada öndürilen etden ýasalan, itler üçin niýetlenen iýmit satuwa çykaryldy diýip, The Guardian neşiri habar berýär.
Itler üçin niýetlenen iýmitiň öndürijisi bolan «Meatly» kompaniýasynyň aýtmagyna görä, bu et towugyň birje ýumurtgasyndan alnan öýjügiň nusgasynyň esasynda öndürilipdir.
Bellenmegine görä bu etiň «adaty towugyň döş eti ýaly tagamy we iýmitlik gymmaty» bardyr. Ol öý haýwanlarynyň saglygy üçin zerur bolan aminokislotalary, ýag kislotalaryny, minerallary we witaminleri öz içine alýar.
2024-nji ýylyň iýul aýynda Beýik Britaniýa Ýewropada haýwanlar üçin niýetlenen iýmitlerde laboratoriýada öndürilen etiň ulanylmagyny goldan ilkinji ýurt boldy. Munuň sebäbi, «Meatly» kompaniýasynyň öndüren towuk etiniň Beýik Britaniýanyň Daşky gurşaw, azyk we oba hojalygy ministrligi (Defra) hem-de Haýwanlaryň we ösümlikleriň saglygyny goramak gullugy (APHA) tarapyndan tassyklanmagydyr.
