2025-nji ýylyň 5-nji fewralynda Ženewada Türkmenistanyň BMG-niň edarasynyň ýanyndaky hemişelik wekili Wepa Hajiýewiň Ženewa Parahatçylyk Platformasynyň (Geneva Peacebuilding Platform) ýolbaşçysy doktor Annissa Bellal hem-de BMG-niň we beýleki halkara guramalarynyň ýanyndaky Parahatçylyk uniwersitetiniň hemişelik wekili, ilçisi Dawid Fernandes Puýana bilen duşuşygy geçirildi. Bu barada "Türkmenistan: Altyn asyr" elektron neşiri habar berýär.
Taraplar parahatçylygy üpjün etmek üçin ynanyşmagyň esasy faktor bolup durýandygyny ara alyp maslahatlaşdylar. Ilçi Hajiýew Türkmenistanyň başlangyjy bilen 2025-nji ýylyň BMG-niň Baş Assambleýasy tarapyndan "Parahatçylyk we ynanyşmak ýyly" diýlip yglan edilendigini ýatlatdy. Şeýle-de, şu ýyl Türkmenistanyň hemişelik Bitaraplyk derejesine eýe bolmagynyň 30 ýyllygy bellenilýär, bu bolsa ýurduň daşary syýasatynyň möhüm binýady bolup durýar.
Duşuşyga gatnaşyjylar halkara giňişliginde parahatçylygy we ynanyşmagy berkitmek maksady bilen bilelikdäki neşirleriň, taslamalaryň durmuşa geçirilmegi hem-de çäreleriň guralmagy boýunça hyzmatdaşlygyň mümkinçiliklerini ara alyp maslahatlaşdylar.
Taraplar mundan beýläk-de özara hyzmatdaşlyk etmäge uly gyzyklanma bildirip, ählumumy durnuklylygy we howpsuzlygy üpjün etmäge gönükdirilen başlangyçlary ilerletmek üçin dialogyň möhümdigini nygtadylar.
