Belarusyň kinoteatrlarynda ýurtda emeli aňyň kömegi bilen döredilen ilkinji doly metražly multfilmiň premýerasy boldy. “Arteki” studiýasynyň “Belowež gür tokaýlygy” (Беловежская пуща) animasion lentasy tomaşaçylaryň arasynda dürli seslenme döretdi, ýöne oňa ilkinji dynç günleri 10 654 adam tomaşa etdi.
Studiýanyň ýolbaşçysy Oleg Atýakşew şeýle taslamalaryň animasion pudak üçin täze mümkinçilikleri açýandygyny aýtdy.
“Eger biz animasiýany “nusgawy” wideo önümçilikde bolşundan has çalt döredip bilýän bolsak, muny etmeli” – diýip, ol belleýär.
Multfilmiň 2024-nji ýylyň dekabrynda görkezilen treýleri hem Belarusda, hem daşary ýurtlarda uly gyzyklanma döredip, 20 milliondan gowrak tomaşa ýygnady. Tomaşaçylaryň pikirleri tapawutlandy, ýöne bu taslama bolan gyzyklanmany barha artdyrdy.
“Kimdir biri tankytlady, kimdir biri, tersine, treýlere uly ruhubelentlik we gyzyklanma bilen garady. Şeýle ýagdaý bize uly ekranlara çykmaga kömek etdi” – diýip, studiýanyň wekilleri belleýär.
Köp tomaşaçylar lentanyň aýdym-saz bezegini öwýär, ýöne sýužetiň gowşaklygyny we wizual babatda meseleleriň bardygyny belleýär.
“Artykmaçlyklary: gowy aýdym-saz. Kemçilikleri: yzarlamasy kyn düşýän gowşak sýužet. Gahrymanlaryň maksatlary käwagt düşnüksiz. Wizual düzüjiler erbet. Kä personaž kadrdan kadra üýtgeýär, käte gaharly wagty gülýär, käte gürlände agzyny ýapmaýar” – diýlip, synlaryň birinde aýdylýar.
