Google-a eýelik edýän Alphabet korporasiýasy geçen ýylyň dördünji çärýegindäki maliýe netijeleri barada hasabat berdi. Jemi girdejisi 12% ýokarlanyp, 96,47 milliard dollara ýetdi, emma bu görkeziji analitikleriň çaklamalaryndan pes boldy diýip, CNBC habar berýär.
Kompaniýanyň bulut hyzmatlaryndan gelýän girdejisi 30% ýokarlanyp, 11,96 mlrd dollara ýetdi, ýöne bu hem maýadarlar üçin garaşylýan netijäni bermedi. Şeýle-de bolsa, kompaniýa hasaplaýyş kuwwatyny giňeltmek üçin şu ýyl 75 milliard dollar sarp etmegi meýilleşdirýär.
Deňeşdirsek, Meta Platforms şu ýyl kapital çykdajylary üçin 60-65 mlrd dollar bölüp berer, Microsoft bolsa bu ugurda 80 mlrd dollar sarp etmegi meýilleşdirýär. Bazar bilermenleri Google-yň bu ugurda 58,84 mlrd dollar sarp edip biljekdigini çaklaýardylar, emma kompaniýa garaşylandan has köp maýa goýmagy meýilleşdirýär.
Geçen çärýekde Alphabet-iň kapital çykdajylary 14 mlrd dollar boldy. Bu görkeziji analitikleriň çaklamasyndan (13,26 mlrd) has ýokary boldy. Şu ýyl kompaniýa bulut hyzmatlary we emeli aň bölümlerinde işgär sanyny köpeltmegi meýilleşdirýär.
Google-yň girdejisi YouTube, gözleg hyzmatlarynda we beýleki hyzmatlar pudaklarynda örän haýal ösdi. Şeýle-de bolsa, YouTube geçen çärýekde 10,47 mlrd dollar girdeji gazanyp, bazaryň çaklamalaryndan has ýokary netijeleri görkezdi.
Bulut hyzmatlarynda Google-yň girdejisi 11,96 mlrd dollar boldy. Maýadarlaryň garaşýan çaklamasy 12,19 mlrd dollar bolsa-da, girdeji geçen ýyl bilen deňeşdirilende 30% ýokarlandy.
Google-nyň mahabat girdejisi çärýek netijelerine görä 10,6% ýokarlanyp, geçen ýylky 11% bilen deňeşdirilende pes boldy. Gözleg hyzmatlarynda girdeji 12,5% ýokarlanyp, geçen ýylky 12,7% bilen deňeşdirilende biraz peseldi. YouTube-yň mahabat girdejisi 13,8% ýokarlanyp, geçen ýylky 15,5% bilen deňeşdirilende pese düşdi. Hyzmatlar pudagyndaky girdeji bolsa 10,2% ýokarlanyp, geçen ýylky 12,4% bilen deňeşdirilende pes boldy.
Alphabet-iň arassa girdejisi geçen çärýek boýunça 28% ýokarlanyp, 26,54 mlrd dollara ýetdi.
