30-njy ýanwarda Salwadoryň Parlamenti bitkoin baradaky kanuna üýtgetmeleri tassyklap, onuň resmi walýuta statusyny aýyrdy. Öň şeýle status satyjylary ABŞ dollary bilen bir hatarda töleg hökmünde aktiwleri kabul etmäge borçlandyrýardy diýip, Investing.com habar berýär.
Bu çözgüt ýurt 2021-nji ýylda dünýäde ilkinji bolup bitkoini döwlet derejesinde kabul edenden soň, garaşylmadyk öwrüm boldy. Häkimiýetler şeýle çözgüdi Halkara pul gaznasynyň basyşy astynda kabul etdi. Gurama 1,4 mlrd dollar karzyň deregine bitkoin bilen bagly töwekgelçilikleri azaltmagy talap etdi. Şertlere görä, üýtgetmeler ýanwar aýynyň ahyryna çenli güýje girmelidi.
Indi kriptowalýuta bilen hasaplar meýletin boldy. Walýuta statusynyň aýrylmagy ony salgyt tölegi üçin ulanmagy-da gadagan edýär.
Ýurduň Prezidenti Naýib Bukele bitkoini ykdysady ösüşiň guraly hökmünde işjeň öňe sürüpdi. Ýöne 2022-nji ýylyň pikir soraşmalary ilatyň 91,7%-iniň haýsydyr bir gowulaşma duýmandygyny görkezdi. Tersine, 2024-nji ýylda Merkezi bankyň gözlegi garyplaryň sanynyň 55 000 adam köpelendigini ýüze çykardy.
Häkimiýetler Chivo gapjygyny ýatyrsa-da, kriptowalýuta başlangyçlaryny ösdürmegi dowam etdirer. Şol bir wagtyň özünde hökümet mundan beýläk-de BTC-e maýa goýmak, maýa goýumlary çekmek üçin kanunlary işläp taýýarlamak, şeýle-de ilata kriptoaktiwleri ulanmagy öwretmek üçin bilim maksatnamalaryny döretmek isleýär.
