Bitkoiniň pese gaçmagy zerarly tutuş kriptobazar tas ýarym trillion dollar ýitirdi

Soňky bir hepdede kriptowalýuta bazary, takmynan, ýarym trillion dollar ýitirdi: 29-njy ýanwardan bäri onuň kapitalizasiýasy 467,6 mlrd dollar azaldy. Esasy zarba bitkoine degdi, onuň pese düşmegi bitkoiniň gorag aktiwi hökmündäki ornuna şübhäni artdyrdy diýip, Bloomberg habar berýär.
CoinGecko-nyň maglumatlaryna görä, sişenbe güni bitkoiniň hümmeti 72 877 dollara çenli aşak düşdi, bu bolsa soňky 15 aýda iň pes görkeziji boldy. Bu Donald Trampyň 2024-nji ýylyň noýabrynda ABŞ-nyň prezidentligine gaýtadan saýlanan pursatyndan bäri iň pes derejedir. Ýylyň başyndan bäri nyrhlar 13% peseldi, 2025-nji ýylyň oktýabryndaky 126 000 dollardan geçen taryhy iň ýokary görkeziji bilen deňeşdirilende bolsa, pese gaçyş 39%-e ýetdi. Çarşenbe güni Aziýa biržalarynda bitkoin 76 200 dollara çenli birneme dikeldi, emma analitikler bazardaky ýagdaýy «çendenaşa gorky» hökmünde häsiýetlendirýär.
Aktiwleriň köpçülikleýin satylmagy geosyýasy dartgynlylygyň ýitileşýän döwründe bolup geçýär. Kriptowalýutalardan tapawutlylykda, adaty gorag aktiwleri bolan altyn we kümüş sarp edijileriň goldawyny aldy.
Maýadar Maýkl Býurri bolup geçýän wakalaryň bitkoiniň spekulýatiw häsiýetini we kesgitsizlik şertlerinde ätiýaçlandyryş guraly hökmünde hyzmat edip bilmeýändigini görkezendigini aýdýar. Galaxy Digital-yň ýolbaşçysy Maýkl Nowogras bazardaky psihologik öwrülişigi belläp geçdi: «Mundan ozal bitkoini her nähili ýagdaý bolanda-da saklamalydygy barada ynam bardy. Emma nähilidir bir ýagdaý bilen bu ynam gowşady we biz hakyky satuwlary gördük».
Hünärmenleriň bellemegine görä, Aziýadaky we ABŞ-daky maýadarlar nyrhlaryň has-da pese düşmeginden çekinip, häzirlikçe garaşmak ýoluny saýlaýar.