2025-nji ýylyň 4-6-njy fewraly aralygynda Budapeştde (Wengriýa) BMG-niň Azyk we oba hojalygy guramasy (FAO) tarapyndan guralan sebitleýin okuw maslahaty geçirilýär. Okuw maslahaty Merkezi Aziýa we Kawkaz ýurtlarynda brusellýoza garşy tapgyrlaýyn göreş meselelerine bagyşlanýar.
Okuw maslahatyna sebitdäki 8 ýurtdan weterinariýa we saglygy goraýyş hünärmenleri gatnaşýar. Türkmenistandan bu çärä Oba hojalygy ministrliginiň ýanyndaky Döwlet weterinariýa gullugynyň hem-de Saglygy goraýyş we derman senagaty ministrliginiň bilermenlerinden düzülen wekiliýet gatnaşýar.
Brusellýoz maldarçylykda esasy howplaryň biri bolup, onuň öňüni almak we oňa gözegçilik etmek üçin toplumlaýyn çemeleşme zerur bolup durýar. Kesele garşy göreşmegiň möhüm ugry «Bitewi saglyk» konsepsiýasyna esaslanýar. Bu çemeleşme haýwanlaryň we adamlaryň saglygyny bilelikde goramak maksadyny öz içine alýar. Bruselýoz keseliniň sebit boýunça giňden ýaýranlygyny we serhetara häsiýetini göz öňünde tutup, oňa garşy netijeli göreşmek üçin sebitleýin çemeleşmäniň ähmiýeti uludyr.
FAO we ABŞ-nyň Keselleri gözegçilikde saklamak we öňüni almak merkezleri (CDC) okuw maslahatynda iki esasy guraly hödürlediler: Brusellýoz bilen tapgyrlaýyn göreşmek üçin SAPCB usuly we brusellýozy ýok etmek üçin STEB guraly. Bu serişdeler ýurtlara brusellýozyň öňüni almak we ony ýok etmek boýunça mümkinçiliklerini seljermäge kömek edýär.
Okuw maslahatynyň esasy maksatlaryna brusellýozy dolandyrmak usullary boýunça çykyşlar, STEB guralynyň öz-özüňi bahalandyrmak üçin ulanylyşy barada maslahatlar we brusellýoza garşy göreşmek üçin milli strategiýalary we meýilnamalary taýýarlamakda esas bolup hyzmat etjek milli hasabatlaryň işlenip düzülmegi girýär. Bu barada TmCars-a okuw maslahatyna gatnaşýan Döwlet weterinariýa gullugynyň wekilleri habar berdi.
