2026-njy ýylda Soçiniň kenarynda Russiýada ilkinji emeli adanyň gurluşygyna başlanar. Onuň meýdany 50 gektar bolar diýip, "Korporasii Ostrow perwyý" korporasiýasynyň dolandyryjy müdiri Bulat Şakirowyň sözlerine salgylanýan RIA Nowosti habar berýär.
Iş başlamazdan ozal, akwatoriýany taýýarlamak üçin gorag gidrawlik desgalary gurlar. Gurluşygy 2031-nji ýylda tamamlamak göz öňünde tutulýar. Deslapky çaklamalara görä, taslama goýuljak maýa goýumlary 1 trillion rubldan (häzirki walýuta hümmetinde 10,2 milliard dollardan gowrak) geçer we 12 ýylda özüni ödär.
Adada myhmanhanalar, apartamentler, sport we gezelenç zolaklary, konsert meýdançalary we Gara deňzini öwreniş barlag merkezi ýerleşer. Gurluşygyň umumy meýdany 150 gektar bolar.
Taslamanyň resminamalary 2025-nji ýylyň ahyryna çenli taýýar bolar. Täze adanyň sebitiň syýahatçylyk mümkinçiliklerini giňeltmegine garaşylýar.
