Hytaýyň Yutong kompaniýasy resmi taýdan dünýäde ilkinji 26 metrlik elektrobusy hödürledi. Üç bölekden ybarat bolan bu ulagyň ilkinji nusgalary Çžençžoudaky zawodda öndürildi we eýýäm Meksika iberilmäge taýýarlanýar.
Modeliň tehniki aýratynlyklary belli däl, ýöne iň täze akkumulýatorlaryň we hereketlendirijileriň ulanylandygy, “geçýän menziliniň uzakdygy”, “ses derejesiniň pesdigi” we “zarýad wagtynyň gysgadygy” bellenilýär.
Awtobus döwrebap sürüjilere kömek ulgamy bilen üpjün edildi we maýyplygy bolan adamlary gatnatmak üçin Meksikanyň ülňülerine laýyk gelýär. Yssy howada rahat gatnaw üçin ýokary derejeli kondisioner ulgamy göz öňünde tutuldy.
Yutong Mexico-nyň ýolbaşçysy Ren Wenhueýiň aýtmagyna görä, awtobus Meksika bazarynyň talaplaryna laýyklykda ýörite döredildi. Yutong öň bu ýurda 100-den gowrak trolleýbus iberdi. Infrastrukturanyň ösmegini göz öňünde tutmak bilen, ol Latyn Amerikasynda gatnawlaryň hilini ýokarlandyrmaga ýardam eder.
E-Bus Radar-yň maglumatlaryna görä, Meksika elektrobus parkynyň ululygy boýunça Latyn Amerikasynda dördünji orny eýeleýär – 744 birlik. Olaryň aglabasy Yutong kompaniýasy tarapyndan öndürildi. Ikinji orny ýene bir hytaý kompaniýasy BYD, üçünji orny ispan kompaniýasy Irizar eýeleýär.
Belläp geçsek, “Türkmenawtoulaglary” agentligi hem Hytaýyň Yutong Bus Co. kompaniýasy bilen awtobus satyn almak boýunça şertnama baglaşmaga ygtyýar aldy. Hyzmatdaşlygyň çäklerinde bu kompaniýadan «Yutong ZK6128HG» kysymly 700 sany awtobusy satyn almak göz öňünde tutulýar.
