Şu gün Ýaponiýanyň Hokkaýdo adasynda ýerleşýän Sapporo şäherinde her ýyl geçirilýän «Ýuki-matsuri» atly gar festiwaly açylýar diýip, Asahi neşiri habar berýär. Bu çäre 1950-nji ýyldan bäri guralyp, her ýyl dünýäniň dürli künjeginden millionlarça tomaşaçyny özüne çekýär.
Bu ýyl festiwal meýdançalarynda 130-a golaý gar we buz heýkelleri görkeziler. Olaryň arasynda tanymal animasiýa gahrymanlarynyň şekilleri, ýapon türgenleriniň heýkelleri, meşhur binalaryň tebigy ululykdaky takyk nusgalary hem bar.
Mundan başga-da, çäräniň çäklerinde gardan heýkeltaraşlyk boýunça halkara bäsleşik hem geçiriler. Oňa Günorta Koreýadan, ABŞ-dan, Litwadan, Polşadan, Singapurdan we beýleki ýurtlardan ussatlar gatnaşar.
Festiwal Sapporo şäheriniň medeni durmuşynyň aýrylmaz bir bölegine öwrüldi. Ilkinji gezek 1955-nji ýylda Ýaponiýanyň Goranyş güýçleriniň bölümçeleri heýkelleriň döredilmegine gatnaşdylar. Şondan bäri, harby gullukçylaryň her ýyl şäheriň merkezine tonnalap gar getirmegi uly däbe we möhüm ýörelgä öwrüldi.
Şu ýyl festiwal 11-nji fewrala çenli dowam eder.
