Ýapon kompaniýasy ispace-iň wekilleri Aý gonuş moduly bolan Resilience tarapyndan düşürilen Ýeriň suratyny neşir etdiler. Bu barada Space.com habar berýär.
Resilience biziň planetamyzdan, takmynan, 10 müň kilometr uzakda wagty, onuň kamerasynyň obýektiwine Ýuwaş ummany düşdi. Suratda gury ýerden iň uzak nokat – Nemo nokady hem görnüp dur.
Resilience 15-nji ýanwarda ABŞ-nyň Florida ştatyndaky Kennedi kosmos merkezinden SpaceX kompaniýasynyň Falcon 9 raketasy arkaly uçuryldy. Missiýanyň meýilnamasyna görä, ol dört-bäş aýdan Aýa ýeter. Ýapon enjamynyň Sowuk Deňiz diýilýän sebite gondurylmagy meýilleşdirilýär.
Onuň bortunda alty dürli peýdaly ýük bar: Aýda suwotylardan azyk önümlerini öndürmek boýunça synag geçirmek üçin modul, Aýyň topragyny (regolitini) ýygnamak üçin enjam, Tenacious atly aý roweri, suwuň elektrolizi üçin enjam, radiasiýa datçigi we Bandai Namco, Inc. gözleg instituty tarapyndan döredilen ýadygärlik ýazgysy.
