Ýaponiýanyň Miýadzima adasynda ýüze çykan uly ýangyn netijesinde 806-njy ýyldan bäri (1200 ýyldan gowrak wagt) dowamly ýanyp duran ebedi ody öz içinde saklaýan meşhur «Reýkado» ybadathanasy doly ýanyp, kül boldy.
Ýangyn irden sagat 8:30 töweregi başlandy. Alaw ilki ybadathananyň esasy binasyny we onuň gapdalyndaky gurluşygy weýran etdi, soňra bolsa golaýdaky tokaýlyga ýaýrady. Herne ýangyny öçürmek başartdy we bu hadysada hiç kime zeper ýetmedi.
Taryhy maglumatlara görä, bu ebedi ody ybadathanany esaslandyryjy, meşhur budda monahy Kukaý tarapyndan ýakylypdy.
Hirosima şäherine atom bombasy taşlanandan soň, şol pajyganyň pidalarynyň hatyrasyyna gurlan ýadygärligiň ebedi ody hem hut şu Miýadzimadaky ybadathanadan äkidilipdi.
Bu ybadathana öz taryhynda birnäçe gezek ýangyna sezewar bolupdy. Hatda geçen ýylda hem tokaýlygyň guramagy sebäpli bu ýerde ýangyn döräpdi.
Ýaponiýanyň habar beriş serişdeleri şu ýylyň başyndan bäri ýurtdaky dini we taryhy binalarda ýangynlaryň sanynyň çaltlyk bilen artýandygyny belleýärler. Meselem, şu maý aýynda adamlary ýangyndan goraýar diýlip ynanylýan, 300 ýyllyk taryhy bolan «Furumaçi Atago» sintoist ybadathanasy hem ýanyp kül bolupdy. Käbir ýangynlar bolsa adamlaryň heläk bolmagyna hem sebäp boldy.
