Ýaponiýada çagalaryň sany azalyp, taryhdaky iň pes derejesine ýetdi. Ýaponiýanyň Dolandyryş işleri we kommunikasiýalar ministrliginiň maglumatlarynda 2026-njy ýylyň 1-nji apreline çenli ýurtda 15 ýaşdan kiçi çagalaryň sany 13,29 milliona deň boldy diýip The Mainichi neşiri habar berýär.
Bu görkeziji geçen ýyl bilen deňeşdirilende 350 müň adam azdyr we statistika ýöredilip başlanan 1950-nji ýyldan bäri iň pes mukdardyr. Çagalaryň sanynyň azalmagy eýýäm yzygiderli 45 ýyl bäri dowam edýär. Deňeşdirmek üçin, 1954-nji ýylda bu görkeziji öz iň ýokary nokadyna – 29,89 milliona ýetipdi. Şeýle-de, 1970-nji ýyllaryň başynda (1971–1974) ikinji jahan urşundan soňky iň köp dogluş hasaba alnypdy.
Täze maglumatlarda görkezilýän ilatyň düzümindäki çagalaryň paýynyň 0,3 göterim azalyp, 10,8%-e düşmegi hem täze bir minimal rekord boldy. Bu statistika ýurtda ýaşaýan daşary ýurtlulary hem öz içine alýar. Sanawyň düzüminde 6,81 million oglan we 6,48 million gyz bar. Ýaş toparlary boýunça iň uly görkeziji 12–14 ýaş aralygyndaky çagalarda (3,09 mln) bolsa, iň pes görkeziji 0–2 ýaş aralygyndaky körpelerdedir (2,13 mln). Bu bolsa dogluşyň peselýändiginiň açyk-aýdyň subutnamasydyr.
2025-nji ýylda Ýaponiýada 705 809 çaga dünýä indi. Bu öňki ýyldakydan 2,1% azdyr. Dogluşyň azalmagy eýýäm on ýyldan bäri yzygiderli dowam edip gelýär. BMG-niň çaklamalaryna görä, ilaty 40 milliondan geçýän ýurtlaryň arasynda Ýaponiýa çagalaryň iň az paýy boýunça dünýäde ikinji ýerde durýar. Ondan-da pes görkezijä (10,2%) diňe Günorta Koreýa eýedir.
Dogluşyň azalmagy ilatyň çalt garramagy we zähmete ukyply raýatlaryň sanynyň kemelmegi bilen utgaşýar. Ýurduň häkimiýetleri 2030-njy ýyla çenli bolan döwri demografik ýagdaýy düzetmek üçin iň soňky mümkinçilik hasaplaýarlar we maşgalalary goldamak ugrunda dürli çäreleri geçirýärler. Ýöne muňa garamazdan, häzirlikçe durnukly üýtgeşme gazanyp bolmaýar.
