Google ulanyjynyň adyndan kärhanalara jaň edip bilýän «Ask for Me» (Meniň üçin sora) atly täze funksiýasyny synagdan geçirip başlady. Bu täze gural hyzmatlaryň bahasyny anyklamaga, elýeterliligini barlamaga we öňünden ýazylmaga kömek edýär.
The Verge neşiriniň maglumatyna görä, häzirlikçe bu funksiýa diňe ulag ussahanalary we manikýur salonlary bilen çäklenýär.
«Ask for Me» Google Search Labs ulgamyna goşulandan soň, gözleg netijelerinde bu hyzmaty ulanmagy teklip edýän bellik peýda bolýar. Ulanyjy bu opsiýany saýlansoň, ulgam birnäçe anyklaýjy sorag berýär: mysal üçin, ulagyň markasyny we modelini, gerekli hyzmatyň görnüşini (ýagy çalyşmak, teker çalyşmak we ş.m.) ýa-da ussahana baryp görmek üçin amatly wagty sorap biler. Şeýle hem, ulanyjy öz islegine görä e-poçta salgysyny ýa-da telefon belgisini girizenden soň, ulgam bu salgylara iň täze maglumatlary iberip durýar.
Bu funksiýa öň restoran bronlary üçin ulanylan Google Duplex tehnologiýasynyň esasynda döredildi. Google-yň wekili Kreýg Eweriň düşündirişine görä, «Ask for Me» arkaly edilýän her bir jaň «bu jaňyň Google-yň ulanyjy adyndan awtomatlaşdyrylandygy» barada habar bilen başlaýar. Kärhanalar Google Business Profile sazlamalary ýa-da emeli aňly bot bilen söhbetdeş bolmak arkaly awtomatlaşdyrylan jaňlary öçürip bilerler. Şeýle-de kompaniýalaryň aşa köp awtomatlaşdyrylan jaň almazlygy üçin bellenilen çäklendirmeler hem bar.
Eweriň aýtmagyna görä, emeli aňly bot tarapyndan ýygnalýan ähli maglumatlar «beýleki ulanyjylaryň meňzeş soraglaryna ýardam bermek üçin» ulanylyp bilner.
