Singapurly Zbioland Luxury Watches kompaniýasy hytaý senenamasy boýunça ýylan ýylyna bagyşlanan «Snake Watch» atly sagadyny tanyşdyrdy. Bu aksessuaryň iň täsin aýratynlygy – sagadyň ýüzünde hereket edýän mehaniki ýylandyr. Ol biri-birine bagly metal böleklerden ýasalan diýip, New Atlas habar berýär.
Ýylan biri-biri bilen baglanyşykly on iki dişli tigiriň kömegi bilen aýlanyp durýar. Onuň hereketi sagadyň çarçuwasyny sagadyň ugruna öwürmek arkaly gurulýan ýaýly mehanizm bilen üpjün edilýär. Bäş gezek öwürseň, ýylan bir minutlap hereket edýär. Ony başlatmak we duruzmak işi sagadyň sag tarapyndaky düwmä basmak arkaly amala aşyrylýar.
«Snake Watch» sagadynyň korpusy ýokary hilli Grade 5 titandan ýasalan, ýüzi bolsa ýakut daşyndan taýýarlanan aýna bilen örtülen. Işleýiş mehanizmi dişli tigirleriň aýlanma ulgamyndan garaşsyz bolup, bir gezek doly gurlanda 38 sagatlap işlemäge ukyply.
Sagat 50 metre çenli suw geçirmeýär.
Häzirki wagtda kompaniýa bu sagadyň köpçülikleýin önümçiligini ýola goýmak üçin Kickstarter platformasynda serişdeleri jemleýär. Sagat 3002 dollardan satuwa çykarylar.
