Elde ýazylan hatlaryň özboluşly gözelligi bar, olarda tekstiň indiwidual häsiýeti we awtoryň el yzynyň duýgulary beýan edilýär. Her bir adamyň deňsiz-taýsyz ýazuwy, onuň şahsy hem-de hünär durmuşynda gymmatly hasaplanýar. Emma emeli aňly robotlar indi bu ugra-da aralaşdylar.
ABŞ-da ýerleşýän App-In Club atly halkara talyplaryň täjirçilik däl guramasynyň barlagçylary adamlaryň ýazuwyny göçürip bilýän robotlaşdyrylan ulgamy işläp düzdüler. Enjamyň bahasy bary-ýogy 56 dollar.
Kiçi göwrümli hem arzan bahaly bu robot hatlaryň, hukuk resminamalarynyň hem-de döredijilik mazmunly tekst wizualizasiýalarynyň awtomatlaşdyrylmagy üçin niýetlenendir.
Konstruksiýanyň esasy bölegi Raspberry Pi platformasy, Pi Pico mikrokontrolleri we 3D çap tehnologiýasy bolup durýar. Ulgam, teksti hereketlere öwürmek üçin emeli aňy ulanýar, şonuň netijesinde ol ýazuwy göçürip bilýär.
Bular ýaly enjamlar öňden hem bar, emma olar has uly we bahalary azyndan 150 dollardan başlaýar.
Barlaglaryň netijelerine görä, enjamyň takyklygy bir setirde ±0,3 millimetre barabar, ýazuw tizligi bolsa minutda 200 millimetre ýetýär. Geljekde alymlar bu roboty bilim ulgamynda ulanmak, mysal üçin, adamlara kalligrafiýa sungatyny öwretmek üçin kämilleşdirmegi meýilleşdirýärler.
Bu täzelikçi ulgam barada arXiv preprint serwerinde beýan edildi.
