Google kompaniýasy Pixel 9 smartfonlarynyň öňki nesil Pixel 8-e garanyňda nädip iki esse berk bolandygyny hem-de olaryň berklik synaglaryndan nähili geçirilýändigini aýdyp berdi. Bu barada kompaniýanyň resmi blog sahypasynda neşir edildi.
«Ulanyjylaryň telefonlaryna ýaramaz bir zat bolanda [mysal üçin, ellerinden gaçanda], şol bir durkunda saklanyp galandygyny görüp geň galmagy bizi begendirýär. Telefony eline alanlarynda döwük ekran ýa-da işlemeýän kamera bilen ýüzbe-ýüz bolmadyk pursatlary – ine, hakyky şatlyk şudur» diýip, Google öz resmi blog sahypasynda ýazýar.
Google geçirilýän synaglarda telefonlary yzygiderli pes beýiklikden taşlaýandyklaryny, olary güýç bilen ýaýkaýandyklaryny we yzygiderli birnäçe gezek rýukzakdan çykaryp, yzyna goýýandyklaryny aýtdy.
Temperatura bilen baglanyşykly synaglar bolsa, «enjamyň -30ºC-den +75ºC aralygyndaky temperaturada dargaman saklanyp bilýändigini» kesgitlemek üçin geçirilýär. Şeýle synaglar hakyky ýagdaýlary hem öz içine alýar. Mysal üçin, «ulanyjy öz telefonyny tomusda tötänleýin Günüň şöhlesiniň astynda goýup gidip bilýär». Smartfonlar birden üýtgeýän temperatura şertlerinde hem barlanýar. Munuň maksady, «ýyly öýden çykyp, gyşyň sowuk howasyna girilende telefonda bolup biljek ýagdaýlary» öwrenmekdir.
