Prezident Serdar Berdimuhamedow Aleksandr Lukaşenko Belarus Respublikasynyň Prezidenti wezipesine gaýtadan saýlanylmagy mynasybetli tüýs ýürekden gutlaglaryny iberdi.
“Türkmenistan däp bolan deňhukuklylyk, birek-birege hormat goýmak we ynanyşmak ýörelgelerine esaslanýan ikitaraplaýyn hyzmatdaşlygy mundan beýläk-de ösdürmäge uly ähmiýet berýär. Siziň parasatly we öňdengörüjilikli baştutanlygyňyzda Belarus Respublikasynyň uly üstünlikleri gazanjakdygyna, döwletara gatnaşyklarymyzyň bolsa hil taýdan täze derejä çykjakdygyna berk ynanýaryn” diýip, Türkmenistanyň Prezidenti hatynda belleýär.
Döwlet Baştutany şu ýakymly pursatdan peýdalanyp, Prezident Aleksandr Lukaşenko tüýs ýürekden berk jan saglyk, abadançylyk, Belarus Respublikasynyň ähli halkynyň bagtyýar durmuşda ýaşamagynyň, gülläp ösmeginiň bähbidine alyp barýan jogapkärli döwlet işinde täze üstünlikleri arzuw etdi.
Belarus Respublikasynda Prezident saýlawlary 26-njy ýanwarda geçirildi. Lukaşenkodan başga-da oňa dört dalaşgär gatnaşdy. Aleksandr Lukaşenko ilkinji gezek 1994-nji ýylyň iýul aýynda Belarusyň Prezidenti saýlanypdy.
