24-nji ýanwarda Türkmenistanyň Döwlet medeniýet merkeziniň Mukamlar köşgünde ABŞ-nyň Türkmenistandaky ilçihanasynyň "Broadway and Beyond" atly konsertleriniň jemleýjisi bolup geçdi.
Öň, TmCars Türkmenistanyň dört şäherinde geçiriljek bu konsertler barada habar beripdi. Konsertler 16-24-nji ýanwar aralygynda Aşgabatda, Türkmenbaşyda, Balkanabatda we Daşoguzda geçirildi. Giriş tölegsiz boldy.
Konsertlerde amerikaly artistler Keýt Bass, Aaron Ýang we Riçard Staýgner, şeýle hem türkmen aýdymçylary Döwran Şammyýew, Munisa Hudaýbergenowa we Maýsa Nyýazowa çykyş etdi.
Çykyşlarda "Moana", "Tarzan", "Anastasiýa", "Zalym" we "Willi Wonka we şokolad fabrigi" ýaly meşhur mýuzikllerden we animasion filmlerden kompozisiýalar ýerine ýetirildi.
Şeýle hem Magtymguly Pyragynyň goşgularyna düzülen aýdymlar iňlis we türkmen dillerinde ýerine ýetirildi.
Riçard Staýgneriň we Türkmenistanyň at gazanan artisti Söhbet Annamyradowyň ýerine ýetirmeginde dutar bilen bitboksyň utgaşygy diňleýjilerde aýratyn täsir galdyrdy.
