Google kompaniýasy Gemini emeli aň kömekçisiniň mümkinçiliklerini giňeldip, oňa birbada birnäçe programmalar bilen işleşip, çylşyrymly ýumuşlary ýerine ýetirmegi öwretdi. Täze funksiýa barada Samsung Galaxy S25 smartfonlarynyň çykmagy bilen yglan edildi. Bu smartfonlarda Gemini esasy kömekçi bolar diýip, The Verge habar berýär.
Indi Gemini has çylşyrymly işleri ýerine ýetirip bilýär. Mysal üçin, ol itler bilen baryp boljak restorany tapyp, maglumaty dostuňa iberip biler ýa-da gowy görýän toparyň oýunlarynyň tertibini tapyp, ony senenama goşup biler. Bularyň ählisi üçin ulanyjynyň bir gezek ýüzlenmegi ýeterlik.
Mundan öň birnäçe programma bilen aragatnaşyk etmek käbir Google programmalaryny öz içine alýan Gemini giňeltmeleri arkaly mümkindi, häzir bu programmalaryň sanawyna Samsung-yň S25 üçin Samsung Calendar, Notes, Reminder we Clock ýaly programmalary hem goşuldy. Bir wagtda birnäçe Gemini giňeltmesini ulanmak mümkinçiligi ähli Android, iOS ulanyjylary we brauzer arkaly elýeterlidir.
Gemini Live ses režimi hem täzelendi, ýöne häzirlikçe diňe Galaxy S25, S24 we Google Pixel 9 üçin elýeterli. Bu gurluşlary ulanyjylar suratlary, faýllary we wideolary Gemini bilen çata iberip, jogap we maglumat alyp biler. Geljekde ekrany bilelikde ulanmak we wideony hakyky wagtda görkezmek ýaly täze mümkinçilikler hem peýda bolar.
Şeýle-de, Circle to Search (“Gözlemek üçin daşyny çyzmak”) funksiýasy kämilleşdirildi, ol indi telefon belgilerini, elektron poçta salgylaryny we salgylanmalary awtomatik kesgitleýär.
Google Braýl displeýlerini we eşidiş enjamlaryny Android gurluşlaryna birikdirmegi hem aňsatlaşdyryp, tehnologiýany mümkinçiligi çäkli adamlar üçin has elýeterli etdi.
