Anna güni Nowak Jokowiç Australian Open-iň germaniýaly Aleksandr Zwerewe garşy ýarym final oýnundan çekildi. Şikes sebäpli serbiýaly tennisçi birinji setde utulandan soň, oýny dowam etdirmekden ýüz öwürdi.
Metbugat maslahatynda Jokowiç bu ýaryşyň özi üçin Melburn kortunda iň soňky bolup biljekdigini aýtdy.
“Iň soňky Australian Open? Bilmedim, ýöne şeýle bolup biler. Möwsümiň nähili dowam edýändigini göreliň. Men dowam etdirmek isleýärin. Iň gowusy, bu ýere ýene gelmeli we oýnamaly. Meniň ynamym ýok, ýöne eger höwes ýokary bolsa, men siziň ýanyňyza ýene gelerin” – diýip, türgen aýtdy.
Şeýlelikde, finalda Zwerew italiýaly Ýannik Sinner bilen duşuşar. Sinner ýarym finalda amerikaly Ben Şeltony 7:6 (7:2), 6:2, 6:2 hasabynda utupdy. ATP-niň reýtinginde birinji orny eýeleýän Sinner titul üçin esasy dalaşgär boldy.
Erkekleriň arasyndaky ýaryşyň finaly 26-njy ýanwarda Melburnda geçiriler.
Zenanlaryň arasynda aýgytly oýun bir gün öň, şenbe güni geçiriler. Dünýäniň birinji raketkasy, belarusly Arina Sobolenko WTA-nyň reýtinginde 14-nji orny eýeleýän amerikaly Medison Kiz bilen duşuşar.
Ýarym finalda Sobolenko ispaniýaly Paula Badosany (12) iki setde utdy – 6:4, 6:2. Kiz bolsa dünýäniň ikinji raketkasy, polşaly tennisçi Iga Swýontekden üstün çykdy – 5:7, 6:1, 7:6 (10:8).
