XPAN tehnologiýasyny ulanýan ilkinji simsiz Wi-Fi nauşnikleri ýakyn wagtda satuwa çykarylar diýip, Android Authority habar berýär.
XPAN, bu Qualcomm kompaniýasynyň täze simsiz aragatnaşyk tehnologiýasydyr. Bu tehnologiýa Bluetooth bilen Wi-Fi aragatnaşygyny birleşdirýär we olaryň birinden beýlekisine geçmäge mümkinçilik berýär. Täze tehnologiýa has uzak aralyklarda hem durnukly baglanyşygy üpjün edýär.
Bu tehnologiýanyň 2024-nji ýylda çykmagyna garaşylýardy. Qualcomm kompaniýasy tehnologiýany gaýtadan köpçülige yglan edip, birnäçe hyzmatdaş kompaniýanyň bu tehnologiýa bilen işleýän enjamlary «gaty tiz wagtda» tanyşdyrjakdyklaryny mälim etdi.
XPAN tehnologiýasy 24-bit ses maglumatyny 96 kGz ýygylykda, hiç hili ýitgisiz geçirmegi üpjün edýär we gaty az energiýa sarp edýär. Şeýle hem bu tehnologiýa iň ýokary maglumat geçiriş tizligini we iň kiçi gijikmeleri hödürleýär. Belläp geçsek, bu oýunçylar üçin örän möhüm bolup durýar.
XPAN tehnologiýasy bilen enjamlaşdyrylan nauşnikler signalyň çeşmesine bolan aralyga baglylykda Bluetooth bilen Wi-Fi arasynda awtomatiki geçiş edýär.
Takyk çykarylyş senelerini yglan etmese-de, Qualcomm kompaniýasy XPAN bilen işleýän ilkinji enjamlary bazara çykarmak üçin işleriň güýçli depginde dowam edýändigini tassyklady.
