Alymlar ysmaz keselli adama diňe pikir güýji bilen wirtual kwadrokopteri dolandyrmagyna mümkinçilik berýän BrainGate2 atly neýrointerfeýsi döretdiler. Miçigan we Stenford uniwersitetleriniň alymlary tarapyndan işlenip düzülen bu ulgam, beýniniň motor korteksine ýerleşdirilen elektrodlaryň neýron signallaryny okamagy arkaly işleýär diýip, Nature Medicine ýazýar.
Geçirilen barlagda, ysmaz bolan hassa wirtual päsgelçilik zolagynda kwadrokopteri ünsli hereketler bilen üstünlikli dolandyrmagy başardy. Ulgam barmaklaryň hereketlerini tanap, kwadrokopteri dik we keseligine dolandyrmaga mümkinçilik berýär. Alymlar motor neýronlaryndan gelýän signallaryň göni okalmagy arkaly, dolandyryşyň öňki usullara garanyňda alty esse kämilleşdirilendigini belleýärler.
Bu tehnologiýa diňe bir güýmenje bilen çäklenmän, geljekde ysmaz adamlara uzakdan işlemek ýa-da döredijilik bilen meşgullanmak ýaly mümkinçilikleriň öňüni açýar.
