Halkara astronomlar topary Gün ulgamyndan uzakda ýerleşýän we üstünde häzirki wagta çenli ölçemek başardan iň güýçli ýeller öwüsýän WASP-127b atly ekzoplanetany tapdylar. Olaryň açyşlary Astronomy & Astrophysics (A&A) ylmy žurnalynda beýan edildi diýip, Reuters habar berýär.
WASP-127b bizden 520 ýagtylyk ýyly uzaklykda ýerleşýär. Bu ekzoplaneta, gaz ägirdi bolup, Ýupiterden birneme uly, ýöne has pes dykyzlykdadyr.
Aslynda, ekzoplaneta ilkinji gezek 2016-njy ýylda ýüze çykaryldy. Ýöne alymlar ýakyn wagtda WASP-127b-niň atmosferasynda, tizligi 33 000 km/s-den hem ýokary bolan aşa güýçli ýelleriň öwüsýändigini anykladylar. Bu tizlik Gün ulgamyndaky ýeliň tizligi iň ýokary hasaplanýan Neptundaky ýeliň tizliginden (1800 km/s) hem has ýokarydyr.
Astronomlar WASP-127b-niň atmosferasyndan geçýän ýyldyzyň şöhlelerini öwrenmek arkaly planetanyň howa şertleriniň kartasyny düzmegi başardylar. Ýewropanyň Günorta Obserwatoriýasynyň äpet VLT teleskopynyň CRIRES+ enjamy, onuň atmosferasyndaky suw buglaryny we ugar gazyny (uglerod monoksidini) ýüze çykarmaga kömek etdi.
Geljekde astronomlar dürli görnüşdäki planetalaryň daşarky howa şertleri barada has köp maglumat ýygnamagy umyt edýärler.
