Tirren deňzindäki Possuoli aýlagynda Neapolyň kenaryna golaý ýerleşýän Punta-Pennata adasy satuwa çykaryldy. Sotheby’s auksion öýi ada üçin başlangyç bahanyň 5 mln ýewrodygyny habar berdi.
Ada hususy emläk bolup, neapolitan maşgalasynyň mirasdüşerlerine degişlidir. Adanyň çäginde ýedi otagly, çakyr saklanýan ýerzeminli we gämi duralgasy bolan gurlup gutarylmadyk jaý bar.
Iki müň ýyl ozal Punta-Pennata rim senatorlarynyň arasynda meşhur bolan ýarymadady. Häzirki wagtda onuň daş-töweregi daýwerleri özüne çekýär, çünki aýlagyň düýbünde kaşaň willalaryň harabalyklary ýerleşýär.
Bakoli kenarýaka şäherçesiniň häkimligi adanyň täze eýesiniň ony ýapyk territoriýa öwürmeginden ýa-da täjirçilik maksatlary, meselem, myhmanhana gurmak üçin ulanyp bilmeginden howatyrlanýar.
Şeýle meýilnamalaryň öňüni almak üçin şäher häkimiýeti adany satyn almak üçin býujet serişdelerini ulanmagy teklip etdi. Ol bu adany jemgyýetçilik seýilgähine öwürmegi meýilleşdirýär. Zerur bolan ýagdaýynda ýerli ýaşaýjylaryň arasynda töleg ýygnamak kampaniýasy yglan ediler.
